Русия оккупацияләгән Кырымдагы кырымтатар хокук яклаучысы һәм журналист Лутфие Зудиевага ят агент эшчәнлеге нигезендә беркетмә төзелгән.
Зудиева үзен үзе ят агент дип тануларын сорап әләк язмаган килеш ят агент эшчәнлеген алып барган диелә.
"ОВД-Инфо" язуынча, беркетмәне Русия юстиция министрлыгы төзегән. Анда Зудиеваның социаль челтәрдәге шәхси аккаунтлары һәм анда "ОВД-Инфо"дагы материалларны бастыру, "Грати" медиасында Кырымдагы хатын-кызлар язмышы турында мәкаләләр һәм подкастлар, Newsweek американ журналы өчен язмалар чыгару, CNN телеканалына әңгәмә бирү, шулай ук Front Line Defenders ирланд хокук яклау оешмасында әгъза булып торуы "сәяси эшчәнлек" буларак бәяләнгән.
- Русия юстиция министрлыгы Лутфие Зудиеваны ят агент буларак быел май аенда тамгалады.
- Элегрәк Зудиева үзен ят агент исемлегенә кертү өчен Русия юстиция министрлыгын мәхкәмәгә шикаять итте.
- Биш ел элек Лутфие Зудиева һәм "Кырым теләктәшлеге" оешмасы активисты Дилявер Меметов Прагага килгән иде. Ул вакытта Азатлык радиосы алар белән кырымтатарларның тормышы, сәяси эзәрлекләүләр турында сөйләште. "Без басымнар туктар, хакимият тә безгә миһербанлы булыр дигән хыял белән яшәмибез. Әмма без бу сынауларны инде 1944 елда уздык, Аллаһ ярдәме белән бер-беребезне яклап боларын да узарбыз. Киләчәгебез гадел һәм якты булыр дип өметләнәбез", дип сөйләгән иде ул.
- 2014 елда Русия Кырымны аннексияләгәннән соң, кырымтатарларны эзәрлекләү очраклары даими булып тора. Хокук яклаучылар һәм активистлар Русия хакимиятләре кырымтатарларны сәяси сәбәпләр белән эзәрлекли, аларның күбесе ярымутрауның Русиягә кертелүенә каршы дип белдерә.
🛑 Русиядә Азатлык Радиосы сайты томаланды, нишләргә?Безнең кулланма.
🌐 Безнең Telegram каналына да кушылырга онытмагыз!
Форум