Израил саклану гаскәре (ЦАХАЛ) 29 августтан башлап Газзә шәһәрендә хәрби чаралар вакытында көн саен игълан ителә торган "тактик тәнәфесләрне" гамәлдән чыгаруы турында белдерде.
"Хәлне бәяләү һәм сәяси җитәкчелек күрсәтмәләре нигезендә, бүгеннән (җомга көнне) иртәнге 10.00 сәгатьтән хәрби хәрәкәтләрдәге җирле тактик тәнәфес Газзә шәһәре җирлегенә кагылмаячак, чөнки әлеге төбәк актив сугыш хәрәкәтләре алып барылучы куркыныч зона булып тора", дип белдерде ЦАХАЛ.
Израил армиясе билгеләп үтүенчә, алар "Израилне саклау максатыннан Газзә сызыгы җирлегендә һуманитар ярдәм күрсәтүне дәвам итәчәк, шулай ук террорчыл оешмаларга каршы хәрби маневрлар һәм һөҗүм чараларны алып барачак".
Элегрәк Израил Газзә шәһәренә һөҗүм планын раслады, шуннан соң армиягә 60 меңнән артык резервист чакырылган. Израил саклану министрлыгы башлыгы Исраэль Кац белдерүенчә, чара тәмамланганнан соң "Газзә йөзен үзгәртәчәк һәм инде элекке кебек булмаячак". Һөҗүм турында ЦАХАЛ 20 августта игълан итте.
Израил мартта Газзә сызыгына барлык һуманитар ярдәм кертүне тыйды, майда ярдәм кертү торгызылды, әмма чикләүләр белән: ризыкны бүлү Газзә американ-израил һуманитар фондына тапшырылды. Фондлар янында оешкан тарату үзәкләрендә еш кына йөзләрчә фәләстинле үлеменә китергән (БМО мәгълүматы) төрле күңелсез хәлләр килеп чыгып торды. Шаһитләр, шул исәптән үзәкнең элекке сакчылары барлык үлемнәрдә Израил хәрбиләрен гаепләде. Израил тыныч халыкның газап чигүе ХӘМӘС аркасында дип әйтә.
- Июль азагында Израил Газзә сызыгының аерым урыннарындагы сугышларда көн саен "тактик тәнәфес" кертү турында игълан итте. Бу Газзәнең тыныч халкына ярдәм җиткергәндә җитди кыенлыклар белән очрашкан БМО һәм халыкара һуманитар оешмаларның эшен җиңеләйтергә тиеш иде.
🛑 Русиядә Азатлык Радиосы сайты томаланды, нишләргә?Безнең кулланма.
🌐 Безнең Telegram каналына да кушылырга онытмагыз!